Forsíða - Fréttir                                       

Dagskrá er alltaf sett inn á þriðjudögum eða degi á undan viðburði, aðrar fréttir eftir því sem þær berast.
Bílaskrá uppfærð þann 08-05--2013 - Sendu okkur eða heimasíðu. Aðalfundur 2013.

---

Traktors- og fornbílasýning í Reykjanesbæ

Fornvéla- og bílaáhugamenn á Suðurnesjum ætla sér að halda sýningu á gömlum bílum og traktorum, uppgerðum á ýmsum stigum, í og við húsnæði Vökvatengis að Fitjabraut 2 í Reykjanesbæ helgina 25. -26. maí. Sýning var haldin í fyrsta skipti í fyrra og þótti takast svo vel að ákveðið var að halda hana aftur. Áhugi fyrir svona gömlu tækjum leynist víða hér á svæðinu, traktorar frá síðustu öld og ýmist tæki úr sveitinni. Inn á milli má svo sjá gamla glæsivagna sem prýddu göturnar í gamla daga. [25.05]

---

Fréttir af Aðalfundi

Aðalfundur var haldinn síðastliðið miðvikudagskvöld og er þetta væntanlega í fyrsta skipti sem aðalfundur er haldinn í okkar eigin húsnæði. Eins og síðustu ár var fundarstjóri og ritari frá JC til að halda öllu formlega. Venjuleg aðalfundardagskrá var haldin, flestir sitjandi stjórnarmenn gáfu kost á sér áfram, en nýr varamaður, Guðný Sigurðardóttir, kom inn og er hún fyrsta konan sem situr í stjórn klúbbsins. Úrslit kosninga eru komnar á síðuna um Aðalfund og um leið og fundargerð frá ritara fundar berst þá kemur hún inn á fundargerðasvæðið. Myndir frá kvöldinu eru komnar á Myndasíðu, og stærri fyrir félaga. [24.05]jsl

---

Messa tileinkuð akstri og umferðaröryggi

Sunnudaginn 26. maí kl. 11 verður messa í Seltjarnarneskirkju sem er tileinkuð akstri og umferðaröryggi. Við í Seltjarnarneskirkju leitum til félaga í Fornbílaklúbbnum sem hafa tök á að hafa bíla sína til sýnis fyrir utan kirkjuna fyrir og eftir messu, frá 10.30 til 12.30. [23.05]jsl

---

04.Aðalfundur (1), 22. maí

Aðalfundur Fornbílaklúbbs Íslands verður haldinn miðvikudagskvöldið 22. maí í félagsheimilinu okkar, Hlíðasmára 9, Kópavogi, 3. hæð.
Dagskrá:
1. Fundur settur, skipan fundarstjóra og fundarritara
2. Skýrsla stjórnar og umræður um hana
3. Skýrslur nefnda
4. Ársreikningur 2012 lagður fram og borinn upp til samþykktar
5. Stjórnarkjör:
a)  Kosning formanns til 2ja ára
b)  Kosning þriggja meðstjórnenda til 2ja ára
c)  Kosning tveggja varamanna til eins 1. árs
6. Kosning skoðunarmanna reikninga
Sjá framboð
- - - Kaffihlé - - -
7. Kjörnefnd kynnir úrslit kosninga
8. Árgjald, umræður og ákvarðanataka
9. Önnur mál
10.Fundargerð lesin og leiðrétt
11.Fundi slitið
Húsið opnar kl. 20.00 og hefst fundurinn kl. 20.30 og eru félagar hvattir til að koma akandi á fornbílum. Aðgangur takmarkast við þá sem greitt hafa félagsgjöld fyrir árið 2013 og hafa þeir einir atkvæðisrétt sem greitt hafa þremur vikum fyrir fundinn. Munið félagsskírteinin. Eftir aðalfundinn verður léttur rúntur ef áhugi er. [20.05]jsl

---

Minnsta 12 strokka vélin

Mörgum þykir gaman að smíða smækkaðar útgáfur af ýmsum hlutum og þarf örugglega mikla þolinmæði og vandvirkni til. Hér er hægt að sjá myndband af smíði 12 strokka vél sem gengur fyrir þrýstilofti. [16.05]jsl

---

Myndir frá síðustu vikum

Ýmislegt hefur verið að gerast í fornbílalífinu í maí, þar á meðal var bílamessa sem er orðin fastur liður á dagatalinu. Sr. Gunnar tekur vel á móti félögum og hefur létta messu sem er að þróast meira í smá tónleika með Einari Clausen og Sr. Gunnar bætti um betur og bauð okkur upp á frumflutning á ljóði/sálmi eftir sjálfan sig. Myndir frá kvöldinu eru komnar á Myndasíðu, og stærri fyrir félaga.



Selfyssingar viðriðu sína bíla þann 1. maí og tóku þátt í hátíðahöldum þar, einnig voru Sunnlenskir Sveitadagar á dagskrá í byrjun maí og voru þar nokkur eldri trakktorar og bílar. Jóhann Þorsteinnson var á báðum þessu viðburðum og tók myndir fyrir okkur hina. [14.05]jsl

---

Skoðunardagur

Árlegi skoðunardagurinn hjá Frumherja var haldinn síðasta laugardag í Reykjavík og á Akureyri. Rigning var í bænum í byrjun morguns, en létti svo til þegar leið á, en rétt um 100 bíleigendur létu það ekki stoppa sig, enda gott að fá smá raka til að liðka upp öll gúmmi og þéttingar eftir vetrarsetu. Að venju var vel veitt af bakkelsi, pylsum og nammi handa þeim sem biðu eða komu til að kíkja á félagana. Strax eftir skoðun var léttur rúntur um miðbæinn. Fyrir norðan var nokkur fjöldi bíla skoðaður og var hið hefðbundna grill auðvitað á dagskrá. Myndir frá deginum eru komnar á Myndasíðu, og stærri fyrir félaga.

Minnum á að Frumherji býður uppá skoðunardag fyrir þá félaga Fornbílaklúbbsins sem búa utan höfuðborgarsvæðisins, mánudaginn 13. maí, eða fyrsta opnunardag stöðvar, ef hún er lokuð á mánudeginum. Sama gjald er á öllum stöðvum, kr. 2100, en panta þarf tíma. [13.05]jsl

---

3. Skoðunardagur / Ferð (1+1) Reykjavík og Akureyri (1)

Hinn árlegi skoðunardagur Fornbílaklúbbsins verður laugardaginn 11. maí og vegna samvinnu við Bílaklúbb Akureyrar verður skoðað fyrir norðan sama dag.
Hjá Frumherja á Hesthálsi er opið frá kl. 9 til 13, og verður morgunkaffi í boði Frumherja og síðan verða grillaðar pylsur á meðan beðið er eftir skoðun. Þegar skoðun lýkur verður léttur rúntur um miðbæinn.
Á Akureyri verður opið frá kl. 10 til 14 og að venju munu BA fólk grilla í hádeginu (gjald).
Skoðunargjaldið er kr. 2100 fyrir hvern fornbíl, en það verð gildir aðeins fyrir félagsmenn FBÍ og BA og því er nauðsynlegt að taka félagsskírteinin með.

Opið á Esjumel kl. 20 til 23 fyrir þá sem vilja sækja bíla fyrir skoðun

Vegna skoðunardagsins 11. maí verða bílageymslur klúbbsins við Esjumel opnar föstudagskvöldið 10. maí frá klukkan 20.00 til 23.00. Þeim félögum sem hyggjast sækja bíla sína fyrir skoðun er bent á þessa tímasetningu. [09.05]jsl

---

02.Bílamessa (1)

Kyrrðar- og samverustund í Digraneskirkju í fimmta sinn. Undanfarin fjögur skipti hefur þessi óhefðbundna messa mælst mjög vel fyrir hjá okkur og Sr. Gunnari, ásamt hans fólki í kirkjunni. Allir eru sammála um að þetta sé góð stund til að minnast fallinna félaga og íhuga um sitt nánasta umhverfi. Eins og fyrri ár ætlum við að hittast við kirkjuna og messa hefst kl. 20.00. Eftir messuna býður klúbburinn ásamt kirkjunni upp á kaffiveitingar. [08.05]jsl

---

Hlíðasmári 20.30 - 23, 8. maí

Hlíðasmárinn opnar kl. 20.30, heitt á könnunni. Aldrei að vita hvaða efni félagar koma með til að skella í dvd spilarann. [07.05]jsl

---

Gisting á Landsmóti

Nú eru bara 45 dagar í Landsmót og fljótlega eftir áramót fóru að berast fyrstu pantanir í húsin hjá Gesthúsi. Verð fyrir gistingu verður sem hér segir:
Eins manns herbergi = 8000 kr. nóttin
Tveggja manna herbergi = 12.000 kr. nóttin
3ja - 4ja manna herbergi = 14.000 kr. nóttin
Morgunverður = 1350 kr. á mann
Tjaldgisting = 1000 kr. á mann
Rafmagn = 500 kr. á tæki.
Lokað er fyrir pantanir á netinu þar sem húsin eru frátekin fyrir félaga fram í miðjan júní, panta skal á gesthus@gesthus.is og taka fram Landsmót. [06.05]jsl

---

Myndir frá Ásbrú

Sumardaginn fyrsta var haldið smá karnival á Ásbrú, í anda þess sem var þegar herinn var hér. Myndir frá þessum degi er hægt að sjá hér, en þeir B&B Kristinsson bræður mættu auðvitað þar með myndavélina. [02.05]jsl

---

Sumartími á Esjumelnum

Frá maí til enda september verður prufað að hafa sumartíma á melnum, fimmtudaga kl. 20-22 í stað sunnudaga. Frekar rólegt hefur verið um sumarið og eins rekst opnun oft á ferðir og ætti að vera auðveldara fyrir félaga að nálgast varahluti um kvöld á virkum degi í stað þess að eyða sunnudegi. [02.05]jsl

---

Sérstakt safn

Johnny Cloud, rétt fyrir utan Yuma, Arizona, hefur safnað T-Ford og ýmsum öðrum gömlum tækjum og verkfærum. Safn þetta er aðallega bara hans áhugamá,l en hefur víst haft opið um vetur hafi einhver áhuga á að kíkja við. Síða um safnið er til og er ekkí á hans vegum og er frekar langt síðan að hún var gerð (2007) svo það er ekki endilega víst hvort safn þetta sé til ennþá, en myndirnar eru þarna það er greinilega ekki verið að stressast yfir "smá" ryki þarna.

Ath. Lokað í Hlíðasmára 1. maí. [30.04]jsl

---

Síðasta miðvikudag

Fyrsti kvöldrúntur "sumars" var síðasta vetrardag og þrátt fyrir snjókomu um morgunin mættu 29 bílar plús einn farfugl á VW frá Tékklandi. Farinn var léttur rúntur um miðbæinn og endað síðan í félagsheimilinu þar sem boðið var í kaffi. Nú er bara að vona að eitthvað fari að hlýna svo það sé enn meira gaman að hreyfa bílana. Myndir frá kvöldinu eru komnar á Myndasíðu, og stærri fyrir félaga. [27.04]jsl

---

Samkoma á Ásbrú

Samkoma á Ásbrúardeginum, mæting er á milli kl. 11.30 og 12.30 við Íþróttaakademíuna. Ekið verður þaðan upp á flugvöll og verða bílar staðsettir við Atlanda stúdíóið eða gamla flugskýlið. Viðvera frá kl. 13.00 til 16.00. Allir velkomnir. [24.03]jsl

---

Kvöldrúntur 24. apríl (1)

Sumarið er að detta inn og fyrsti kvöldrúntur sumars er á dagskrá miðvikudaginn 24. apríl. Síðustu ár hefur verið mjög góð mæting í fyrsta rúnt og ekkert nema snjór sem getur breytt því. Mæting er kl. 20 við Perluna og áætluð brottför kl. 20.30. Farið verður í rúnt um bæinn og endað í félagsheimilinu okkar Hlíðasmára 9 þar sem verður boðið í kaffi. Leiðarlýsing [23.03]jsl

---

Framboðsfrestur liðinn

Frestur til að skila framboðum til stjórnar eða lagabreytingum rann út í lok dags þann 19. apríl. Flestir af þeim sem voru í endurnýjun gáfu kost á sér áfram en eitt nýtt framboð er í sæti varamanns. Engar lagabreytingar voru lagðar fram. Framboðin er hægt að sjá á sér síðu um Aðalfund 2013. [22.03]jsl

---

Íslenskur í Showoff á CarDomain

CarDomain er nokkuð þekkt síða þar sem eigendur bíla setja inn myndir og upplýsingar um sinn eða sína bíla ásamt upplýsingum um uppgerð eða annað sem viðkemur bílnum. Sigurbjörn Helgason benti okkur á að fornbíll hans hefði verið valinn sem Showoff of the Week, en vikulega er kosið um þá bíla sem hefur verið bent á. [19.03]jsl

---

Árleg Ford Mustang sýning

Hin árlega Ford Mustang sýning Brimborgar og Íslenska Mustang klúbbsins verður haldin þann 20. apríl. Mikið verður um dýrðir en líkt og undanfarin ár verða fjölmargir stórglæsilegir fákar til sýnis í Ford salnum, Bíldshöfða 6. Aðgangur er að sjálfsögðu ókeypis og sýningin er opin á milli kl. 10 og 16. Þetta er í fimmta sinn sem sýningin er haldin. Rúmlega tuttugu bílar, sem flesta daga ársins eru vandlega geymdir innandyra, verða samankomnir í Ford salnum. Um helmingur bílanna hefur ekki verið sýndur áður. Þema sýningarinnar í ár eru bílar árgerð ´71-´73 sem eru yngstu bílar fyrstu kynslóðar Mustang. Það var einmitt Mustang ´73 fastback sem átti stórleik í klassísku myndinni Gone in 60 seconds. Meðal sýningarbílanna verður ´71 árgerð Mustang Mach-1 429 en einungis 533 eintök voru framleidd í þessari útfærslu. Ef veður leyfir verður farið á rúntinn í lok sýningar og verður það sjón að sjá þegar nokkrir tugir Mustang bíla fara spólandi úr hlaði Brimborgar. [18.03]jsl

---

Kvikmyndakvöld á Akureyri í kvöld, 17. apríl

Sýnd verður mynd um Muscle Cars úr Automaniac þáttaröðinni frá History Channel Félagar úr báðum klúbbum eru auðvitað velkomnir, kvöldið er haldið í húsnæði BA og opnar þar kl. 20.30. sýning hefst kl. 21 og boðið verður upp á kaffi. [17.03]jsl

---

Fræðslukvöld Hlíðasmára, 17. apríl

Þetta kvöld verður framhald á námskeiðahaldi á vegum félaga okkar, Rúnars Sigurjónssonar, en að þessu sinni mun hann fræða okkur um viðgerðir á yfirbyggingum, Margar spurningar vakna oft þegar kemur að boddý viðgerðum og ryðbætingum, en ætlunin er að svara þeim flestum á þessu námskeiði. Húsið opnar kl. 20.30 og dagskrá hefst kl. 21. Kaffi og meðlæti á kr. 500. [16.03]jsl

---

Kvikmyndakvöld í Borgarnesi, 16. apríl

Fyrsta kvöldið í samvinnu við Fornbílafjelag Borgarfjarðar verður á dagskrá þriðjudagskvöldið 16. apríl, en kvöldið verður haldið í húsnæði FBF í Brákarey. Er þetta í framhaldi af formlegra samstarfi klúbbana og um leið er reynt að færa einhverja dagskrá nær félögum okkar á þessu svæði. Sýnd verður heimildarmynd um sögu Jeep úr safni History Channel. Félagar úr báðum klúbbum eru auðvitað velkomnir, húsið opnar kl. 19.30, sýning hefst kl. 20.30 og boðið verður upp á kaffi. [15.03]jsl

---

Kjörnefnd minnir á framboð í stjórn

Kjörnefnd vill minna á að framboð til stjórnar (eða breytingartillögu á lögum) skal hafa borist kjörnefnd einum mánuði fyrir aðalfund, frestur til að skila inn framboði er 19. apríl. Hægt er að kynna sér framboðin á Kosning 2013. Áhugasamir geta haft samband við formann kjörnefndar, Grétar, í síma 892 1413. [12.03]jsl

---

Rabbkvöld í Keflavík, 11. apríl

Kvöldið er í Íþróttaakademíunni og húsið opnar kl. 19.30, heitt á könnunni. [10.04]jsl

---

Rabbkvöld Hlíðasmára, 10. apríl

Hlíðasmárinn opnar kl. 20.30, heitt á könnunni. Aldrei að vita hvaða efni félagar koma með til að skella í dvd spilarann. [09.04]jsl

---

Blaðið okkar loksins að koma út

Fornbíllinn hefur ekki komið út í nokkur ár en stefnt var að koma út blaði fyrir síðasta vor, ýmsar tafir hafa orðið á því en loks rættist úr því og ætti blaðið að berast félögum upp úr miðjum mánuði, en dagatal fyrir 2013 verður sent út um leið. Stefnt er að koma síðan út blaði í apríl ár hvert, en auðvelt er fyrir félaga að hjálpa við útgáfu með því að senda inn efni á ritstjorn@fornbill.is sem gæti verið öðrum félögum til fræðslu eða skemmtunar. [08.04]jsl

---

Radio Flyer

Margir muna eftir þessum kerrum, bæði úr æsku eða úr bíómyndum, enda hafa þessar kerrur verið vinsælar og eru reyndar ennþá í framleiðslu eftir rúmlega 80 ár. En vilji fólk upplifa æskuna og sitja í og fara um á svona kerru þá er upplagt að gera það sama og þessi eldri hjón, sjá vídeó. [04.04]jsl

---

Nýtt aðgangsorð og útstrikun

Vert er að minna á að samkvæmt lögum klúbbsins sem voru samþykkt á síðasta aðalfundi þá tekur útstrikun gildi þann 30 .mars, en ekki í byrjun maí eins og áður var. Skilaboð hafa verið send út og í þeim er nýtt aðgangsorð að lokuðum svæðum sem ætlaðar eru félögum. Ármiðar verða sendir út um miðjan apríl um leið og dagatalið og blaðið okkar. Þeir sem greiða árgjaldið í þessum mánuði, og fram að þremur vikum fyrir aðalfund, fara auðvitað aftur á félagaskrá. Skil á árgjaldi fyrr á árinu er mun eðlilegra og kemur betur út fyrir þá aðila sem veita félögum afslátt, þar sem ekki þarf að útskýra að 2012 miði gildi fram í miðjan maí. [03.04]jsl

---

Fræðslukvöld í Hlíðasmára, 03. apríl

Þorsteinn Jónsson mun kynna og fræða okkur um ritverk sitt “Reykvíkingar - fólkið sem breytti Reykjavík úr bæ í borg”. Nú þegar hafa fyrstu bindin komið út en alls áætlar Þorsteinn að bindin verði tíu. Unnið er út frá manntali Reykjavíkur árið 1910 og reynt er að skrásetja, íbúa, með mynd, og er hver gata tekin fyrir sig. Húsið opnar kl. 20.30, dagskrá hefst kl. 21. Kaffi og meðlæti á kr. 500. [02.04]jsl

---

WWW Leita á fornbill.is